Þegar að þetta blogg er skrifað er útborgunardagur jibbí :-) Marsmánuður runninn upp og það snjóar úti. Hundurinn minn Spotti liggur á gólfinu hjá mér og furðar sig á því hvað sé  hægt að sitja fyrir framan eitthvert tæki og já ............... einmitt. 

Ég get núna stoltur sagt frá því að ég er orðinn eigandi í flugfélaginu Geirfugli sem að er hlutafélag 173 manna og kvenna sem eiga 8 flugvélar og hafa aðstöðu í tveimur flugskýlum til að geyma vélarnar. Hver hlutur er metinn á um 390.000 krónur Íslenskar og veitir manni rétt til að fljúga vélum Geirfugls að uppfylltum ákveðnum skilyrðum. Það er því ekki nóg að hafa réttindi til að fljúga vélinni frá flugmálastjórn heldur setur félagið strangari reglur. Ýmist bara að fara í tékk á viðkomandi vél með flugkennara út í það að þurfa sér þjálfun á t.d stélhjól eða skiptiskrúfu og ákveðinn tímafjölda (yfir 100 tímana) Ég er kominn með 210 tíma í heildina og hef reynt að drífa mig í loftið þegar að veðrið gefst.

Æ ég nenni ekki að skrifa meira.

Jæja kæru vinir og ættingjar og önnur jólabörn :-)

Nú er loksins komið að því. Upp er runninn aðfangadagur og það sem meira er að það er hvítur snjór yfir öllu. Alveg einstaklega jólalegt. Ég sit hérna við tölvuna og nýt þess í botn að gera ekki neitt annað en að hugleiða og senda jólakveðjur á fésbókinni. Mig langar mikið til þess að birta hérna jólaguðspjallið til áminningar um hátíðina og hvað hún stendur fyrir.

En það bar til um þessar mundir, að boð kom frá Ágústusi keisara, að skrásetja skyldi alla heimsbyggðina. Þetta var fyrsta skrásetningin og var gjörð þá er Kýreníus var landstjóri á Sýrlandi. Fóru þá allir til að láta skrásetja sig, hver til sinnar borgar.

Þá fór og Jósef úr Galíleu frá borginni Nasaret upp til Júdeu, til borgar Davíðs, sem heitir Betlehem, en hann var af ætt og kyni Davíðs, að láta skrásetja sig ásamt Maríu heitkonu sinni, sem var þunguð. En meðan þau voru þar, kom sá tími, er hún skyldi verða léttari. Fæddi hún þá son sinn frumgetinn, vafði hann reifum og lagði hann í jötu, af því að eigi var rúm handa þeim í gistihúsi.

Frelsari fæddur

En í sömu byggð voru hirðar úti í haga og gættu um nóttina hjarðar sinnar. Og engill Drottins stóð hjá þeim, og dýrð Drottins ljómaði kringum þá. Þeir urðu mjög hræddir, en engillinn sagði við þá: "Verið óhræddir, því sjá, ég boða yður mikinn fögnuð, sem veitast mun öllum lýðnum: Yður er í dag frelsari fæddur, sem er Kristur Drottinn, í borg Davíðs. Og hafið þetta til marks: Þér munuð finna ungbarn reifað og lagt í jötu."

 

Og í sömu svipan var með englinum fjöldi himneskra hersveita, sem lofuðu Guð og sögðu:

Dýrð sé Guði í upphæðum,
og friður á jörðu með mönnum,
sem hann hefur velþóknun á.

Þegar englarnir voru farnir frá þeim til himins, sögðu hirðarnir sín á milli: "Förum beint til Betlehem að sjá það, sem gjörst hefur og Drottinn hefur kunngjört oss." Og þeir fóru með skyndi og fundu Maríu og Jósef og ungbarnið, sem lá í jötu. Þegar þeir sáu það, skýrðu þeir frá því, er þeim hafði verið sagt um barn þetta. Og allir, sem heyrðu, undruðust það, er hirðarnir sögðu þeim. En María geymdi allt þetta í hjarta sér og hugleiddi það. Og hirðarnir sneru aftur og vegsömuðu Guð og lofuðu hann fyrir það, sem þeir höfðu heyrt og séð, en allt var það eins og þeim hafði verið sagt.


Að lokum vil ég óska þess að þið hafið það reglulega gott um jólin. Reynið að njóta þess að slaka á og hafa það gott.

Mínar bestu óskir sendi ég ykkur um Gleðileg Jól og farsælt komandi ár.

Þegar að þetta er skrifað eru 15 dagar til jóla og hátíð ljóss og friðar á næsta leiti. Mig langaði af því tilefni að birta hérna litla jólasögu sem vakti mig til umhugsunar og kannski höfðar  hún til ykkar.

Lítil hjartnæm Jólasaga.

Þessi saga gerðist fyrir mörgum árum.

 

Maður nokkur refsaði 3ja ára gamalli dóttur sinni fyrir það að eyða heilli rúllu af gylltum pappír. Ekki var mikið til af peningum og reiddist hann þegar barnið reyndi að skreyta lítið box til að setja undir jólatréð.

 

Engu að síður færði litla stúlkan föður sínum boxið á jóladagsmorgun og sagði: "Þetta er handa þér pabbi". Við þetta skammaðist faðir stúlkunnar sín fyrir viðbrögð sín daginn áður. En reiði hans gaus upp aftur þegar hann áttaði sig á því að boxið var tómt. Hann kallaði til dóttur sinnnar, "veistu ekki að þegar þú gefur einhverjum gjöf, þá á eitthvað að vera í henni?"

 

Litla stúlkan leit upp til pabba síns með tárin í augunum og sagði: "Ó pabbi boxið er ekki tómt. Ég blés fullt af kossum í það. Bara fyrir þig pabbi." Faðirinn varð miður sín. Hann tók utan um litlu stúlkuna sína og bað hana að fyrirgefa sér.

 

Það er sagt að mörgum árum seinna, þegar faðir stúlkunnar lést, og hún fór í gegnum eigur hans hafi hún fundið gyllta boxið frá því á jólunum forðum við rúmstokkinn hans, þar hafði hann haft það alla tíð; þegar honum leið ekki vel gat hann tekið upp ímyndaðan koss og minnst allrar ástarinnar sem barnið hans hafði gefið honum og sett í boxið.

 

Í vissum skilningi höfum við allar lifandi mannverur tekið á móti gylltum boxum frá börnunum okkar, fjölskyldum og vinum, fullum af skilyrðislausri ást og kossum. Það getur enginn gefið dýrmætari gjöf.

 

Í dag skaltu gefa þér augnablik og njóta stórrar handfylli af minningum. Og mundu að þær verma hjarta þitt og bráðna þar, en ekki í höndum þínum

 

Vonandi hafið þið það gott á aðventunni og mögulega skrifa ég eitthvað hérna þegar að nær dregur að jólum.

En þangað til bless í bili :-)

Ég eignaðist lítinn frænda núna 15. október 2010 en þá eignuðust Kristín systir mín og Þröstur maðurinn hennar sitt annað barn. Hann var svo skírður í Lindarkirkju í Kópavogi 3. nóvember síðastliðinn. Honum var gefið nafnið Hrafn Helgi. Báðir bræðurnir eru þá skírðir í höfuðið á öfum sínum seinni nöfnin. Hrannar Ari og Hrafn Helgi.

Ég er svo búinn með fyrsta Bootcamp námskeiðið mitt á þessu ári og byrjaður á því næsta. Þetta er þá fjórða námskeiðið mitt sem ég tek.

Þyngdin er að komast í eðlilegt horf. Er orðinn 100 kg og á því bara eftir 20 kg og þá er ég góður.

Þegar að þetta er skrifað þá er Hjálparsveitin að selja Neyðarkallinn á fullu og gengur sú sala vel. Við héldum útkallsæfingu núna á Miðvikudaginn síðasta en þá var boðuð út í æfingarútkalli leit að rjúpnaskyttu á Hlöðufelli. Fólki var skipað að græja sig fyrir slíka leit og svo þegar að allir voru tilbúnir þá var farið yfir búnaðinn hjá hverjum og einum og kom þá í ljós hvort að fólk var með allann réttann útbúnað til þess að fara í útkall af þessu tagi. Málið er nefninlega ekki alltaf að vera fljótur á staðinn þegar að útkall kemur heldur að vera tilbúinn í það sem fyrir liggur. Frumskylda björgunarmannsins er að huga fyrst og fremst að eigin öryggi og þetta er einn mikilvægasti þátturinn í því að vera vel búinn í útkallið og flýta sér ekki á kostnað öryggisins.

Þegar að búið var að fara yfir búnaðinn fórum við æfingaferð upp í Innstadal á Víking 1 og Víking 3. Nokkur snjór var kominn og gamann að athafna sig þarna í myrkri og snjókomu.

Ég segi sjálfur frá því að mig vantaði ýmislegt í pokann minn svo að ég gæti talist hæfur í þetta útkall. Ég bætti úr því og það sem að ég ekki átti keypti ég. Endaði á því að kaupa mér skíðagleraugu, skíðahanska, innanundirhanska, flíshanska, vinnuhanska, 3 ullarsokka og svo nesti fyrir 24 klst úthald í óbyggðum. Ég á hjálm, karabínur, prússikteip, sigbelti og sigtól, tvær ísaxir, ísbrodda og varða tösku undir þá svo þeir gati ekki pokann minn, gps göngutæki, ullarbrók og ullarbol, flíspeysu og flísbuxur, björgunarsveitargallann, rústabjörgunargallann,
tetra heyrnartól, höfuðljós með aukarafhlöðum og svokallaðann aulapoka eða lúðapoka en hann inniheldur bæði sjúkrabúnað og búnað fyrir leit og björgun, svo er ég með göngustafi, svefnpoka og þunna frauðdýnu undir mig ef ég þarf að sofa eitthvað.

Aulapokinn inniheldur:
Sjúkrabúnað (grisjur, latexhanska, plástra ofl) og skæri.

Hníf, áttavita, málband, handvasaljós (með auka rafhlöðum) , sjónauka , blikkandi reiðhjólaljós, skriffæri og skráningarblað fyrir sjúklinga. Svo er ég með myndavél á símanum mínum ef að ég þarf að taka myndir.

AÐ LOKUM VIL ÉG HVETJA ALLA SEM LESA ÞETTA TIL AÐ STYRKA BJÖRGUNARSVEITIRNAR OG KAUPA NEYÐARKALLINN ÞVÍ VIÐ ÞURFUM Á YKKAR HJÁLP AÐ HALDA.

Ég er aftur byrjaður í Bootcamp og skráði mig á 6 vikna námskeið. Ekki var úr vegi að fara að hreyfa sig aftur en það er ár síðan að ég fór síðast á Bootcamp námskeið. Einhvern veginn þarf ég á þessum aga að halda. Yfirleitt næ ég að fara kl 6 á morgnana en ef að ég er á næturvakt nóttina áður þá mæti ég í seinnipartstíma.
Nei þvílík tilviljun, ég er akkurat á næturvakt núna og það er æfing kl 6 í fyrramálið. Ég verð víst að mæta bara kl 18 annað kvöld.

Hjálparsveitin hélt um daginn upp á 35 ára afmælið sitt. Húsið var opnað fyrir almenningi og margir góðir gestir komu. Séra Jón Ragnarsson sóknarprestur blessaði húsið og sveitin fékk margar góðar gjafir og góðar kveðjur.
Um kvöldið fóru svo meðlimir sveitarinnar og gerðu sér glaðann dag, það var grillað og boðið upp á skemmtiatriði og fleira skemmtilegt. Fjörið fór fram í Golfskálanum upp í Gufudal og margir eldri félagar mættu og rifjuðu upp gamla tíma.

 Af áhugamálunum mínum er það að frétta að ég verð að viðurkenna að ég hef ekkert farið í flugtíma síðan að ég fór hringinn í kringum Snæfellsnes um daginn. Fjórhjólið fékk hins vegar aðeins að fara út að pissa í gær. Ég hef aðeins verið niðri í hjálparsveitarhúsi í tengslum við þetta afmæli og já svo var útkall í gær.Byssan er hins vegar óhreyfð inni í byssuskáp og ekki hvarflað að mér að fara á gæs þetta haustið. Brói hefur eitthvað farið og náð einhverju skilst mér.
Ég hef aðeins verið að fylgjast með þessum viðburðum sem að eru að gerast á alþingi þessa dagana og ég er ekki alls kostar sáttur. Ég er að tala um þessa kosningu þar sem eingöngu Geir Hilmar Haarde fyrrverandi forsætisráðherra er einn gerður að blóraböggli bankahrunsins. Mikill skrípaleikur að mínu mati og lögin um landsdóm algjörlega úrelt fyrirbæri. Hvaða lagalegu forsendur hafa alþingismenn til að ákveða hvort að eigi að ákæra einhvern fyrir eitthvað mögulega refsivert athæfi. Það á eingöngu að vera á færi lögreglu að rannsaka, saksóknara að ákveða hvort ákært verði og dómara að dæma. Alþingi á að mínu mati hvergi að koma þar nærri. Enda sáu allir að niðurstaða kosninga ber keim af pólitískum sandkassaleik.
Ég segi að þjóðin hafi ekki efni á því að pólitíkusar séu á einhverjum nornaveiðum á meðan að ekkert er gert fyrir fólkið í landinu. Það er ekkert búið að gera, fólk er enn að missa húsin sín og margir eru bæði atvinnulausir og jafnvel eiga ekki fyrir mat. Ekki furða að fólk sé reitt. Maður skilur það alveg. Við skulum bara vona að einhverjir vitleysingar sem vilja beita ofbeldi og skemma hluti fái ekki að stjórna þessu því að flestir vilja mótmæla án ofbeldis eða skemmdarverka.

Þar sem að ég sit hérna á næturvaktinni og reyni að hugsa eitthvað meira að segja þá dettur mér nú ekkert meira í hug. Þannig að ég ætla að hætta í bili. :-)

Ef ég hef vísað þér á þessa síðu út af fjórhjólinu þá er hlekkur hérna vinstra megin sem heitir myndasöfn. Þar má finna margar myndir af  hjólinu. Svo eru myndbönd af hjólinu á www.youtube.com/saevaroa

Bestu kveðjur Sævar Örn Arason

Ég fór í flugtúr í gær á Snæfellsnes. Dagurinn byrjaði á því að ég fór á Selfoss og sótti GPS tæki heim til bróður míns sem hafði notað það um daginn á gæsaveiðum. Eftir að búið var að ná í tækið var haldið til Reykjavíkur.
Á Reykjavíkurflugvelli hitti ég Dóra félaga minn og var vélin okkar sem er af gerðinni Diamond DA-20 Eclipse og heitir TF-FGA eða FRIÐRIK GUNNAR ALFREÐ tilbúinn til brottfarar. Dóri var þegar búinn að framkvæma fyrirflugsskoðun og setja á hana eldsneyti. Bara þurfti að slá inn kenntölu og nafn mitt í farþegaskrá og hringja inn flugplanið.

Við komum okkur fyrir í vélinni og fljótlega hófust við handa við tékklistana og vélinn rauk í gang stuttu seinna. Við fengum heimild eins og venjulega til að aka úr Fluggjörðum akveg GOLF í reynslutöðu við skýli 4. Þar héldu tékklistarnir áfram og vélin var keyrð upp. Eftir uppkeyrslu fengum við heimild til að aka bestu leið í brautarstöðu á braut 01.
Lokatékkið fyrir flugtak var framkvæmt:
 
FUEL PRIME OFF
FUEL PUMP ON  
MIXTURE RICH
IGNITION BOTH
GEN/BAT SWITCHED ON
FLAPS TAKEOFF
TRIM NEUTRAL

Vélin var klár í brautarstððu og þegar að heimildin kom (FGA LEIÐ 1 OG HEIMILT FLUGTAK BRAUT O1) var vélinni gefið fullt afl, mótórmælar á grænu og stýra miðlínu.

Smá hliðarvindur frá hægri og vélinn var kominn í 1000 fet á augabragði. Leið 1 er 1500 fet hægra megin við Viðeyjarstofu, ákveðna eyju og að síðustu kennileiti sem heitir Tangi og þar kallar maður sig út úr flugvallarsviði Reykjavíkurflugvallar.

REYKKJAVÍK TURN FRIÐRIK GUNNAR ALFREÐ ÚT VIÐ TANGA

Fengum heimild til að skipta yfir á Reykjavík aðflug/brottflug 119.00 MHz og kölluðum okkur inn

REYKJAVÍK AÐFLUG FRIÐRIK GUNNAR ALFREÐ FRAMHJÁ TANGA Í 1500 FETUM Á LEIÐ Á STYKKISHÓLM FÖRUM UM SKAGA OG ÆTLUM AÐ KLIFRA Í 2500 FET

2500 fetin voru í lagi og við héldum leið okkar áfram. Veðrið var hið ákjósanlegasta og varla ský á himni. Framhjá Skaga kölluðum við okkur inn og héldum áfram um Borgarnes og upp á Mýrar og við flugvellinn á Kaldármelum kölluðum við okkur aftur inn þar sem að við erum við það að fara út úr aðflugsstjórnarsviði Reykjavíkur. Skipt var yfir á Landsbylgju en REYKJAVÍK FLUGSTJÓRN var hlustuð að gamni.

Við héldum 2500 fetunum allann tímann flogið var á Stykkishólm og þar tekin ein snertilending á flugvellinum. Áfram var farið framhjá Grundarfirði og Kirkjufellið skartaði sínu fegursta. Vængum var aðeins vaggað yfir Grundarfirði til heiðurs ....................................... Þið vitið það sem eigið að vita það. Áfram var haldið framhjá Ólafsvík, Hellissandi og á Rifi var lent og stoppað stutt. 

Ég náði meira að segja að éta nokkur Krækiber á flugvellinum. Enda var ég nestislaus og varð að bjarga mér :-)

Cessna 172 vél Flugskóla Íslands að ég held TF-FTM var á flugvellinum og farþegar hennar og flugmaður sjálfsagt brugðið sér eitthvað. 

TF-FTO tók líka eina snertilendingu á Rifi þegar að við vorum þarna. Strýturnar vestan við Snæfellsjökulinn voru skoðaðar. Það væri gaman að vita hvernig svona myndast.

Við fórum í loftið og upp í 2500 fet. Flogið var eftir suðurströnd Snæfellsnes og þar sem að veðrið var svo gott sást vel allt Reykjanesið. Það væri nú gaman að fara einhvern tímann beint yfir ef að maður væri á tveggja hreyfla vél. :-) En mikið svakalega eru fallegar þessu gulu strandir þarna á sunnanverðu Snæfellsnesi.

Við Kaldármela kölluðum við okkur inn í aðflugsstjórnarsvið Reykjavíkur og gáfum umbeðnir um þær upplýsingar að við ætluðum að fara til Reykjaíkur um Skaga og að við myndum halda 2500 fetunum allann tímann. Mýrarnar tóku við og stórfenglegt útsýni þar sem að því er virðist endalausir pollar og sker heilla augað.

Framhjá Borgarnesi fórum við allnokkru vestar en áður og Framhjá Skaga gaf aðflugsstjórn okkur leyfi til að kalla okkur inn til Reykjavíkur.

REYKJAVÍK TURN FRIÐRIK GUNNAR ALFREÐ FRAMHJÁ SKAGA Í 2500 FETUM OG ÓSKUM EFTIR AÐ KOMA INN TIL LENDINGAR.

FRIÐRIK GUNNAR ALFREÐ QNH 1019, LEIÐ 1 FYRIR BRAUT 01 OG ATHUGA UMFERÐ Á MÓTI

Við svöruðum og á hægri hönd töluvert fyrir ofan okkur var fokkerinn að athafna sig og skömmu seinna fór TF-FGB framhjá okkur út leið 1.

Við fengum heimild á Kringluna og áttum að koma inn á hægri þverlegg fyrir braut 01

Lendingarheimild á braut 01 kom eftir að vél sem var í brautarstöðu 31 fór í loftið og við lentum á Reykjavíkurflugvelli. Ekið var sem leið liggur ECHO GOLF í fluggarða og þar með lauk skemmtilegri flugferð.

Við fórum svo í framhaldinu ég, Ísarr og Dóri upp í Mosfellsbæ og kíktum á flugvöllinn á Tungubökkum en þar var verið að sýna bæði flugvélar, bíla, mótorhjól, dráttarvélar, módel og svo voru vöfflur til sölu.

Um kvöldmatarleytið var grillað og ég var kominn heim um kl 11 um kvöldið.

Hérna áttu að koma kortamyndir af fluginu en það virkaði ekki. Þeir sem að hins vegar eru vinir mínir á fésbókinni geta séð myndirnar hér http://www.facebook.com/?ref=logo#!/album.php?aid=73985&id=1148637921

Vonandi  hafa allir haft gaman af þessu.

 

Nú er liðin vika síðan litla tíkin mín hún Týra kvaddi þennann heim og hélt inn í annann. Týra var orðin eftir því sem að mér reiknast til 7 ára gömul og heilsuhraust framan af aldri. Hún var afskaplega trygg og fylgdi manni allt sem að maður fór. Hún var líka einstaklega skemmtilegur og góður félagi.

Fyrir allnokkru síðan fór að bera á því hjá henni Týru að hún steig ekki í hægri afturlöppina og stóð þetta yfir í þrjá daga og lagaðist svo. Ekki varð ég var við neitt meira í nokkurn tíma. Svo gerðist það um verslunarmannahelgina á föstudeginum að ég fór með Spotta og Týru í göngu upp á lítið fell sem að er við Flúðir en þar var ég í útilegu ásamt fleira fólki. Fellgangan gekk vel og Týra og Spotti voru sátt ásamt eigandanum sem að fékk góða hreyfingu í leiðinni.

Daginn eftir eða á Laugardeginum fór að bera á heltinu aftur og ég fór að skoða þetta betur. Á hægri afturlöpp Týru var komin kúla sem að hún meiddi sig í og steig illa í löppina. Á mánudeginum hætti hún alveg að stíga í löppina. Ég fór með hana í myndatöku og fékk hún bæði sprautu og svo verkjatöflur í 10 daga og leið henni eitthvað betur. En í myndatökunni kom í ljós að eitthvað var að. Mögulega gat þetta verið beinhimnubólga eða jafnvel æxli. Eftir frekari pælingar og ráðfæringar við Dýralækni lá enginn vafi á því að þarna var um æxli að ræða og ekkert annað að gera en að lina þjáningar hennar.

Týra var svæfð Þriðjudaginn 18. Ágúst 2010 og var það mikill sorgardagur fyrir mig. Ég var hjá henni allann tímann á meðann að hún var að sofna og er hugur minn enn hjá henni. Það þykir kannski sumum skrítið hversu erfitt það getur verið að þurfa að láta hundinn sinn fara. Manni fer að þykja óskaplega vænt um þessi grey. Það verður að segjast að þessir örfáu dagar sem að ég hef verið án Týru hafa verið frekar skrítnir. Ég ætla alltaf að fara út í skúr og annaðhvort að hleypa henni út eða að gefa henni. Kannski verður það svoleiðis enn um sinn.

Ég ákvað í framhaldinu að gefa hann Spotta minn og fór hann á gott heimili í Grafarholti og virtist honum vel líka vistin þar.

Mig langaði bara að deila þessum hugsunum mínum með ykkur. Þið sem að eruð hundavinir skiljið sjálfsagt nákvæmlega hvað ég á við.

VIÐVÖRUNARORÐ ÁÐUR EN ÞÚ LEST ÞETTA. EFTIRFARANDI SAGA ER HÖNNUÐ AF FLUGNÖRDUM FYRIR AÐRA FLUGNÖRDA. SAGAN LESIST MEÐ ÞAÐ Í HUGA

Í gærdag  þann 8.ágúst 2010 fórum ég og Dóri félagi minn í flugtúr að Hvítárvatni. Veðrið var hið ákjósanlegasta og þegar kl sló 12:00 gekk ég inn fyrir hliðið á Reykjavíkurflugvelli þar sem ég sá í skottið á Dóra þar sem að hann var að taxera Diamond Eclipse DA-20 vél flugfélagsins Geirfugls upp að eldsneytisdælunni. Hún ber nafnið TF- FGB sem merkir hreinlega að hún sé frá Íslandi þar sem að allar flugvélar skráðar á Íslandi bera TF upphafsstafina en þeir eru aldrei nefndir í nafni vélarinnar nema hún fari út fyrir landssteinana. FGB merkir FRIÐRIK GUNNAR BJARNI og byggist á flugstafrófinu eða FOXTROT GOLF BRAVO  á ensku. Enska er notuð þegar að þú heyrir einhvern tala ensku á radíótíðninni eða ert ávarpaður á ensku. Þá er umsvifalaust skipt yfir í ensku.

Ég gekk mína leið að dælunni og þar drap Dóri á vélinni  og kúpullinn á vélinni opnaðist. Því næst var svokölluð ground lína eða jörð tengd í vélina en það er til þess að koma í veg fyrir að það sé hleðslumismunur á milli vélar og dælu sem gæti svo orsakað neista en slíkt er bæði óæskilegt og hættulegt við eldsneytisáfyllingu. Því næst var eldsneyti dælt á vélina og gengið frá bæði ground vírnum og eldsneytisbyssunni. Lítrastaðann á dælunni var skilmerkilega skráð í flugbók vélarinnar.

Næst var farið í að skoða vélina. Allir hlutar flugvélarinnar eru skoðaðir að utan og stýrisfletir hreyfðir. Þreifað er utan á vængjum og stýrisflötum. Dekk og hjólabúnaður ásamt öllum festingum og skrúfum eru vel kannaðar. Eldseytissýni er sett í svokallað drain glas og það skoðað hvort að nokkuð af vatni eða gruggi sé í eldsneytinu. Svo er ekki. Olíukvarðinn er skoðaður og kannað hvort að magnið sé ekki næganlegt fyrir þetta flug. Hreyfillinn eða proppurinn er skoðaður og hvort að hann sé ekki heill og kannað hvort að nokkuð séu sprungur eða eitthvað óeðlilegt við hann. Að lokum er stollflautann prófuð en hún gefur til kynna aðvörun þegar að vélin nálgast svokallaðann ofrishraða. Ofris er þegar að vélinn fer svo hægt að hún nær ekki lengur að fljúga og nefið fellur skyndilega fram og vélin missir hæð. Slíkt má alls ekki gerast í flugtaki  og í aðflugi í lágum hæðum.

Þegar búið var að skoða vélina var farið inn í félagsheimili Geirfuglanna og gerðir þyngdar og jafnvægisútreikningar og það skráð skilmerkilega inn í tölvu sem að heldur utan um allt saman. Einnig var nafn mitt og heimilisfang skráð niður þar sem að ég er farþegi í þessu flugi. Því næst var lagt inn flugplan og þar lestu eftirfarandi upplýsingar til turnsins í Reykjavík í gegnum síma. Áætlaða flugleið, áætlaðann flugtíma, flugþol (sem er hversu lengi þú getur flogið með núverandi eldsneyti) og hversu margir eru um borð.

Svo var gengið út í vél og við festum okkur niður. Næst var tekið til við að lesa tékklista og fyrr en varir var vélin kominn í gang. Tíminn er alltaf skráður þegar að vélin fer í gang, við flugtak, við lendingu og þegar að drepið er á vél. Svo er svokallaður tachotími skráður fyrir og eftir flug til þess að sjá hver tímastaðann er á mótornum. Eftir tacho tíma er líka rukkað og allar skoðanir og viðhald miðast við ákveðnar tölur á honum.
Við fengum fljótlega heimild frá Reykjavík Grund að heimilt væri að aka eftir akvegi Golf frá Fluggörðum og að uppkeyrslusvæði við skýli 4 og kalla á turninn þegar að við værum tilbúnir að aka. (Sem merkir þegar við værum tilbúnir í loftið) Það má aldrei nota orðið flugtak fyrr en við flugtak. Þess vegna er sagt tilbúinn að aka.

Mótorinn var keyrður upp og báðar kveikjur prófaðar og gengið úr skugga um að vélin væri í góðu lagi fyrir flug. Allt slíkt er framkvæmt samkvæmt nákvæmum tékklista og alltaf gert eins. Loksins var komið að því og við kölluðum REYKJAVÍK TURN FRIÐRIK GUNNAR BJARNI TILBÚINN AÐ AKA. og við fengum svarið til baka FRIÐRIK GUNNAR BJARNI AKA ECHO YFIR 19 OG AÐ SKÝLI 1. Þegar að við komum að skýli 1 var önnu vél á undan okkur og beið við braut 31. Hún fékk heimilt í brautarstöðu á 31 og við fengum heimilt í brautarstöðu fyrir aftan hana. Hún rúllaði í loftið og stuttu seinna kom heimildin okkar FRIÐRIK GUNNAR BJARNI VINSTRI BEYGJA OG LEIÐ 4 HEIMILT FLUGTAK BRAUT 31
og svarið var VINSTRI BEYGJA OG LEIÐ 4 HEIMILT FLUGTAK BRAUT 31.

Aflinu var gefið inn og vélin jók hraðann, á 44 hnútum var byrjað að hala í hana og hún lyftist mjúklega af jörðinni. Klifrað var á brautarstefnu í 500 fet og vinstri beygja tekinn og stefnd á Vífilsstaðaspítala og klifrað upp í 1500'  Við fórum framhjá Vífilsstöðum í 1500 fetum og við Vatnsendahæð kölluðum við okkur út úr svæði REYKJAVÍK TURN FRIÐRIK GUNNAR BJARNI ÚT VIÐ VATNSENDA við skiptum svo yfir á austursvæði traffík sem er umferð á Sandskeiðsflugvelli og nágrenni.

Flugið var hækkað upp í 3500 fet í bili (hærra komumst við ekki útaf skýjum) og stefnan tekin á Þingvallavatn. Framhjá Þingvöllum, Laugarvatni og Apavatni var stefnan tekin að tjaldsvæðinu við fossinn Faxa við Tungnaréttir og flugið lækkað og svæðið yfirflogið í 2000 fetum en fjölskyldan var þar í útilegu. Aftur var flugið hækkað og núna fórum við með góðu móti upp í 5500 fet enda var skýjahæðin töluvert hærri þegar að þangað var komið.

Stefnan var tekinn lengra inn í landið að Langjökli og flogið að Hvítárvatni. Margar góðar myndi voru teknar af jöklinum og vatninu sjálfu. Þetta vatn er alveg gríðarstórt. Ég hef nú komið nokkrum sinnum að því akandi en svona úr loftið sá maður það enn betur. Við tókum nokkrar hringi þar og síðan var stefnan tekin til baka að Jarlhettunum og í framhaldinu voru bæði Hagavatn og Sandvatn skoðað og myndir teknar. Næst var flogið að Geysi og svo aftur á Gullfoss. Við vorum eiginlega í góðu hringflugi þarna og eltum nánast farveg Hvítár tókum nokkra hringi yfir Gullfossi og þaðan var stefnan tekin á Flúðir og brautin þar yfirflogin. Við vorum þarna að þvælast um Verslunarmannahelgina og vildum skoða betur brautina úr lofti. GPS tækið var stillt og fengum við útreiknað að við næðum til Reykjaíkur kl 14:32 en við áttum að skila vélinni kl 15:00.

Í rólegheitunum tókum við stefnuna aftur að Þingvallavatni og yfir Nesjavallavirkjun og aftur inn í Austursvæði. Þar var kallað í flugturninn í Reykjavík. REYKJAVÍK TURN FRIÐRIK GUNNAR BJARNI Í AUSTURSVÆÐI ÓSKA EFTIR AÐ KOMA INN TIL LENDINGAR. Svarið kom um hæl FRIÐRIK GUNNAR BJARNI KOMA LEIÐ 4 FYRIR BRAUT 31.
Heimildin um að koma leið 4 fyrir braut 31 var endurtekinn og við lækkuðum okkur í 1500 fet. Leið 4 er að fara hægra megin við Vatnsendahæð og  Vífilsstaðaspítala í 1500 fetum og fyrir braut 31 sem er brautin sem stefnir í vestur þá er lækkað niður í 1000 fet að svokölluðum KÓPAVOGSLÆK og þaðan er aðflugið flogið nokkurveginn að Borgarspítala í 500 fet og þaðan ertu í beinni línu yfir Öskjuhlíðina niður á braut 31 Lendingarheimild kom á stuttri lokastefnu. FRIÐRIK GUNNAR BJARNI HEIMIL LENDING BRAUT 31 og við svöruðum HEIMIL LENDING BRAUT 31 FRIÐRIK GUNNAR BJARNI. Dóri alveg smurði vélinni inn og akstursheimildin var sem leið liggur FRIÐRIK GUNNAR BJARNI AKA ECHO GOLF Í fluggarða og það var eins og áður endurtekið. Vélinni var lagt við skýli Geirfugla og þar tóku næstu við henni og sjálfsagt hefur hún verið komin fljótlega í loftið.

EINS OG VARAÐ VAR VIÐ ÁÐUR EN ÞETTA VAR LESIÐ ER ÞETTA HANNAÐ AF FLUGNÖRDUM FYRIR AÐRA FLUGNÖRDA. VONANDI HAFA SAMT FLESTIR HAFT GAMAN AF ÞESSU. 

Móðuramma mín Jarþrúður Soffía Ásgeirsdóttir eða amma Fía eins og hún var alltaf kölluð lést núna 27. júlí síðastliðinn. Hún var jörðuð í kyrrþey og að viðstöddu hennar nánasta fólki.

Hér eru nokkur orð til hennar Ömmu sem að mig langar að birta hérna.
　

Elsku besta amma mín. Ég veit að þú hvorki vildir umstang né einhverjar upptalningar á lífsferli eða nokkura dramatík. En ég get því miður ekki sleppt því að skrifa eitthvað en ég skal reyna að hafa það stutt. Ég vona að þú samþykkir það.

Ég vildi bara fá að nota þetta tækifæri til þess að þakka fyrir það að hafa kynnst þér og þakka fyrir allar þær góðu stundir sem okkur hefur hlotnast að eiga saman.

Dugnaður þinn og eljusemi verður mér alltaf hvatning. Þú hvorki kveinkaðir þér né kvartaðir sama hvað gekk á. Þú barst hag annara fyrir brjósti og hugsaðir meira um okkur í fjölskyldunni en sjálfa þig.

Amma, tíma þínum hér í þessu jarðlífi er lokið og ekkert fær því breytt. Ég hefði viljað hafa hann lengri en ég veit að það er eigingirni og því er það besta sem ég geri er að óska þér velfarnaðar í nýjum heimkynnum og óska ég þess að þú munir þar finna allt það sem að þú þráir að finna.

Ég ætla ekki að hafa þetta lengra eins og ég lofaði en sendi hér með lítið ljóð sem lætur í ljós óskir mínar og hugsanir.

Löngum ferli lokið er,
lífsins bók er skráð,
upp þú skerð af akri hér,
eins og til var sáð.
Til ljóssins heima lífið snýr,
langt með dagsverk þitt,
Drottinn sem þér bústað býr,
barnið þekkir sitt.

Í margra huga er minning skær,
og mynd í hjarta geymd.
Stöðugt okkur stendur nær,
stund sem ekki er gleymd.
Nú komið er að kveðjustund,
klökkvi hjartað sker,
nú gengin ertu Guðs á fund,
sem góður líknar þér.

(höfundur Kristján Runólfsson)

Guð blessi þig amma mín.

Þinn Sævar

Komst í stuttann flugtúr í dag um Reykjanesið. Tékklistar voru æfðir ásamt því að þjálfa snör viðbrögð við mótormissi.Lögð var áhersla á svokölluð Boxed Items sem eru hlutir sem að maður verður að muna án tékklista. Einnig kallað gera fyrst tékka svo. Svo var farið í snertilendingar í Reykjavík þar sem að flugtúrnum lauk.

Svo verður veðrið að ráða því hvenær maður fer næst.

Gott í bili.

Nú er Jónsmessan nýgengin um garð og eflaust margir sem að hafa velt sér upp úr dögginni á Jónsmessunótt ýmist í eiginlegum eða óeiginlegum skilningi.

Alveg eins og við höldum upp á fæðingarhátíð Krists í svartasta skammdeginu þá er ekki úr vegi að fagna fæðingarhátíð Jóhannesar skírara í minnsta skammeginu.

Eftirfarandi er lesning um Jónsmessuna og er hana að finna á Wikipedia.com

Njótið vel.

Jónsmessan er fæðingarhátíð Jóhannesar skírara enda eru Jón og Jóhannes tvö afbrigði sama nafns í íslensku. Í gömlum ritum er Jóhannes skírari oft nefndur Jón eða Jóan skírari eða baptisti. Dagsetningu Jónsmessu má rekja til ákvörðunar Rómarkirkjunnar að haldið skyldi upp á fæðingardaga Jesú Krists og Jóhannesar skírara á fornum sólstöðuhátíðum, á stysta og lengsta degi ársins á norðurhveli jarðar. Samkvæmt Nýja testamentinu fæddist Jóhannes um það bil sex mánuðum á undan Jesú.

Að Jesús sé fæddur í svartasta skammdeginu þegar sólarganginn tekur að lengja, er auðvitað þrungið merkingu og táknar þá von sem Jesús færir mannkyninu samkvæmt kristinni guðfræði. Því passaði það fullkomlega að fæðing Jóhannesar skyldi tímasett þegar sólargangur væri sem lengstur.

Þegar júlíanska tímatalinu var komið á í Rómaveldi á 1. öld f. Kr., héldu Rómverjar upp á 24. júní sem lengsta dag ársins. Það tímatal lá til grundvallar ákvörðun Rómarkirkjunnar nokkrum öldum síðar að messudag Jóhannesar skírara bæri upp á þann dag. Menn gerðu sér þá ekki grein fyrir því að sumarsólhvörf höfðu færst fram um þrjá daga miðað við stjarnfræðilegar sólstöður. Jónsmessu ber því ekki upp á lengsta dag ársins fremur en jólin á stysta dag ársins.

Jónsmessa hefur alla tíð haft á sér aðra mynd á Íslandi en sunnar í Evrópu. Í Evrópu er hún miðsumarshátíð, samanber leikrit Shakespeares, A Midsummer Night’s Dream sem á íslensku nefnist Draumur á Jónsmessunótt. Þar tíðkuðust svallveislur miklar, brennur og dansleikir sem gjarnan tengdust ýmsum yfirnáttúrlegum verum, nornum og djöflum.

Skiljanlega leist mörgum kirkjumanninum illa á slíka hegðun á helgum degi. Marteinn Lúter sveiflaðist til dæmis milli þeirrar skoðunar að gleði alþýðunnar ætti rétt á sér og að hegðun hennar líktist mest hjáguðadýrkun. Þrátt fyrir viðleitni kirkjunnar manna er enn haldið upp á Jónsmessu með brennum, dansi og drykkju, en hátíðarhaldið hefur vissulega orðið hóflegra í löndum Evrópu eftir því sem aldirnar liðu.

Náttúrufar, atvinnuhættir og samfélagsforsendur hafa komið í veg fyrir að Jónsmessuhátíðin skipaði sama sess á Íslandi og annars staðar. Jónsmessan er ekki um miðsumar samkvæmt gamla íslenska tímatalinu, sumarið er ekki hálfnað fyrr en um miðjan júlí. Á þjóðveldisöld hófst Alþingi dagana kringum 24. júní og því ekki tími fyrir almenn hátíðahöld kringum landið. Síðar seinkaði setningu Alþingis, líklega vegna kólnandi veðurfars sem tafði fyrir öllum vorverkum og kom enn frekar í veg fyrir að menn gætu gert sér glaðan dag á Jónsmessu. Strjálbýli landsins gerði samkomur allar erfiðar og vegna skógleysis voru litlar forsendur fyrir því að halda miklar brennur á þessum tíma með tilheyrandi söng og dansi.

Bjartar nætur hafa líka átt sinn þátt í því að máttur góðra sem illra vætta hefur þótt í lágmarki kringum Jónsmessu og því lítil ástæða til að þóknast þeim með dýrkun hverskonar sem einkenndist af svalli í Evrópu. Jónsmessunótt þykir þó enn með mögnuðustu nóttum ársins en þá yfirleitt tengd náttúrutrú ýmiss konar. Jónsmessunæturdöggin á að vera heilnæm, hvort sem fólk veltir sér upp úr henni nakið eða lætur sér nægja að ganga í henni berfætt. Jónsmessunótt er einnig góður tími til að finna steina með ýmsar heilsusamlegar náttúrur og til að tína grös til lækninga – sú venja gæti átt sér vísindalega stoð því efnasamsetning jurta er auðvitað breytileg eftir árstíma.

Nú á dögum ættu aðstæður að vera hátíðahöldum á Jónsmessu meira í vil en fyrr á tímum. Hlýrra veðurfar gerir það að verkum að vorverkum bænda er gjarnan lokið fyrir Jónsmessu og heyskapartíð ekki enn hafin. Það sem helst hefur staðið gleðskap á Jónsmessu fyrir þrifum er hve nálæg hún er þjóðhátíðardeginum 17. júní. En á móti kemur að sífellt fleiri kynnast Jónsmessuhátíðum erlendis, og betri efnahagur og styttri vinnutími eykur eftirspurn eftir skemmtunum þannig að krafan um gleðskap á Jónsmessu kann að styrkjast á næstu árum og áratugum.

Heimildir og myndir:

• Árni Björnsson, Saga daganna, Mál og menning, Reykjavík 1993
• Catholic-forum.com
• Midsummer festival

Sveitarstjórnarkosningar í dag og spennandi kosningavaka/evróvisionvaka heima hjá Ísarri í kvöld. :-)

Eitthvað er þetta nú orðið dapurt á þessari síðu. Það sem gerst hefur markvert er að það varð gos á fimmvörðuhálsi og síðan í toppgíg Eyjafjallajökuls.
Gárungarnir segja að eldgosið í Eyjafjallajökli sé til þess að búa til pláss í helvíti fyrir fjárglæframenn og það hafi meira að segja stoppað í nokkra daga á meðan að rannsóknarskýrslan kom út því djöfsi vildi vita hversu stórt pláss þyrfti. Ekki veit ég hvað er til í því :-)

Svo segja sumir að af því að það sé ekkert C í stafrófinu okkar að þegar að Gordon Brown bað um Cash að þá fékk hann bara Ash.

Ég er búinn að fara einu sinni norður á Sauðárkrók á þessu ári og stefnan er að fara aftur á næstunni. Ég sé ekki fram á að ég fari neitt út á þessu ári en mögulega eftir áramótin 2010/2011

Svo mun það gerast 1.október................................................... Hvað ætli það sé :-)

Ég allavegana tel niður. Kannski mun þessi dagsetning breytast en það verður bara að koma í ljós.

Kosningar eru svo á vori komanda og því ekki úr vegi að skoða hversu vel flokkarnir í heimabænum hafa staðið við kosningarloforðin.

Nóg í bili :-)

Ég fór í dag ásamt Svenna á Varmá í fjallgöngu á hið mikilfenglega og stórvirkja eldfjall Heklu. Við lögðum af stað úr Hveragerði kl 7 í morgun og vorum lagðir af stað á fjallið sjálft rétt fyrir kl 9. Farið var upp Næfurholtsmegin sem að er ekki hefðbundin gönguleið og sú leið ívið brattari og torsóttari. Lárétt fórum við um það bil 16 km gangandi fram og til baka. Hæsta mæling á GPS tækinu sýndi 1496 m á toppnum á Heklu. Við fengum sýnishorn af öllum veðrum sem að mögulega hægt var að fá allt frá glaða sólskini yfir í snjókomu, slyddu og hörku rigningu. Ég er ekki frá því að það hafi jafnvel komið smá haglél líka.
Við vorum komnir niður af fjallinu um fimmleytið seinni partinn og var þá ekið til baka og komið í Hveragerði rétt fyrir 7 um kvöldið. Semsagt 12 tíma ferli sem virkilega var gaman að upplifa þrátt fyrir töluverðann sólbruna í andlitinu,blöðrur og afrifur.

Mæli með því að sem flestir kíki á Hekluna því það er þess virði.